ГРЧКИ МЕДИУМИ: Како известуваат за посетата на Коѕијас?

Добивај вести на Viber

Спорот со името и посетата на грчкиот министер за надворешни работи, Никос Коѕијас на Македонија е топ тема во грчките медиуми.

Весникот Катимерини по средбата на Коѕијас со неговиот македонски колега Никола Димитров пренесува дека разликите на двете преговарачки страни, само се потврдиле.

„Можат да се забележат значајни разлики во преговарачките позиции на Грција и Скопје, и покрај продолжувањето на консултациите. Еден од проблемите е промената на Уставот на земјата, што беше потврдено и со одговорите на Никола Димитров на новинарите, кои покажаа скептицизам во врска со можноста за ревизија на Уставот“, -  Катимерини

Весникот наведува и дека спорот со името во изминатиот период се интензивирал и на меѓународно ниво, а како причина за тоа го наведува можното влегување на Македонија во НАТО.

Катимерини потсетува на американските апели за решавање на спорот, но и на јасното предупредување од Москва до Скопје дека пристапот на Македонија во НАТО ќе создаде проблеми во билатералните односи меѓу двете земји. 

Наведуваат и дека грчката страна не е задоволна од предлогот кој бил доставен од македонска страна.

„Овој текст како да беше напишан од самиот Груевски, затоа што ги содржеше сите радикални позиции на скопската страна“, -  пренесува ЕРТ

Грчката телевизија Антена  пренесува дека главна пречка е Уставот на земјата и барањето за име за севкупна употреба.

„Се покажа дека во двата текста од Атина и Скопје, постојат важни разлики, а главниот „трн“ е Уставот. Грција смета дека по секоја цена треба да има уставна ревизија и да се смени уставното име затоа што само така ќе важи ерга омнес. Скопјаните, пак сакаат двојна формула“, - јави Антена

Медиумите кај јужниот сосед пишуваат дека денешниот ден е особено важен, затоа што по маратонските средби во Скопје би се разјаснило дали има поклопување на позициите на двете земји во пресрет на состанокот со медијаторот, Метју Нимиц кој треба да се одржи идната недела во Виена.