ГРЦИТЕ МИНИМАЛНО ГИ УПОТРЕБУВААТ: Црногорците ќе воведат казни за пластични кеси
Објавено во: Економија, Балкан 15 Февруари, 2020
За употреба на пластични кеси казни и до 20.000 евра. Ваква мерка ќе се воведе во Црна Гора.
Министерството за одржлив развој и туризам на Црна Гора со Предлог-законот за управување со отпад предвидува забрана на кеси, вреќи и торби за еднократна употреба изработени од пластичен материјал.
Целта е заштита на животната средина, објави РТЦГ.
Предлог-законот пред пратениците треба да се најде во септември, а со него се предвидуваат строги казни за правни и физички лица во распон од 500 до 20.000 евра за правно лице, од 500 до 6.000 евра за претприемачи и од 30 до 2.000 евра за физичко лице.
Грците употребата на пластични кеси ја сведоа на минимум.Од 1,8 милијарди во 2017, бројот на пластични кеси во супермаркетите во Грција, во 2019 се намалил на 24 милиони, односно за 98,6 отсто, според податоците на грчкиот Институт за истражување на малопродажни производи, јави дописничката на МИА од Атина.