Груевски вели дека во судот може веќе да му се даде канцеларија и плата

Добивај вести на Viber

Eкс премиерот и поранешен претседател на ВМРО-ДПМНЕ, Никола Груевски вели дека во судот доаѓа толку често што треба да ми дадат канцеларија, а и да добива плата. 

Ова Груевски го изјави денеска пред новинарите по завршувањето на рочиштето за случајот  „Траекторија“.

Се пожали дека против поранешното раководство на партијата се води политички прогон и додаде дека судството е претворено во „политичка гилотина“. 

Груевски смета дека одбраната и обвинетите немаат еднаков третман од судот во однос на СЈО.

„Кон обвинителите се однесуваат со почит, спокојно и мирно, додека кон одбраната судот реагира нервозно, што како да покажува на која страна е. Судот воопшто не се обидува да го скрие тоа. Барем да глуми малку објективност за јавноста“ – рече Груевски.

Во  „Траекторија“ обвинети се  Груевски, поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

Груевски, Јанакиески, Пешевски и Георгиевски се обвинети дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево - Охрид ги искористиле и пречекориле своите овластувања.