Хајко Мас по гласањето за Македонија: Одлуката на Бундестагот ќе ги убеди и другите во ЕУ

Добивај вести на Viber

Министерот за надворешни работи на Германија, Хајко Мас, и честиташе на Македонија по одлуката на Бундестагот на земјата да и се одобри датум за преговори со ЕУ во октомври и наведе дека позитивниот исход од гласањето ќе влијае и другите земји-членки, кои не се убедени до крај, да го одобрат истото.

„Одлуката го подвлекува значењето кое Западниот Балкан го има за ЕУ. Истовремено јасно се става до знаење дека реформите се ценат. Обете земји мораат да ги продолжат реформските напори, за да го продолжат патот кон ЕУ. Јас сум убеден дека условениот пристап на Бундестагот ќе убеди и други во ЕУ да го одобрат почетокот на преговорите“, изјави шефот на германската дипломатија.

Пратениците на Бундестагот, со големо мнозинство изгласаа владата да пристапи кон отворање на пристапни преговори со Северна Македонија во октомври. „За“ гласаа 476 пратеници, против 122, а 16 беа воздражани. Од Македонија се бара исполнување на критериумите за членство во ЕУ, но и гаранција за заокружување на реформите, особено во делот на владеење на правото.

Благодарност до Германија веднаш по зеленото светло упатија премиерот Зоран Заев, министерот за надворешни работи Никола Димитров, вицепремиерот за евроинтеграции Бујар Османи и претседателот Стево Пендаровски.

За официјален почеток на пристапните преговори ќе биде потребна позитивна одлука на самитот на шефовите на држави и влади на земјите членки на Европската Унија кој ќе се се одржи на 17 и 18 октомври во Брисел.