Хан и Рикер доаѓаат „на дебата“ за СЈО
Објавено во: Македонија 23 Јули, 2019
Еврокомесарот за проширување Јоханес Хан доаѓа в четврток, додека в.д. помошникот државен секретар на САД за Европа и Евроазија и добропознат дипломат на овие простори Филип Рикер пристигнува в петок во Македонија на средби со лидерите од македонската политика.
Пристигнувањето на двајцата влијателни функционери се поклопува со денешниот поччеток на дебатата на новиот закон за иднината на СЈО на собраниска седница. Предлог-законот за јавното обвинитество во кое СЈО треба да се интегрира како Јавно обвинителство за организиран криминал и висока корупција е на предлог на Владата. Премиерот Зоран Заев веќе најави дека очекува за истиот да се дебатира две недели.
Посетите коинцидираат со новонастаната ситуација поврзана со СЈО и влегувањето во Собрание на новиот предлог-закон за јавното обвинителство, така што не е исклучено да се примени и дипломатски притисок.
Лидерската средба по ова прашање која што ја иницираше Заев не се одржа минатиот петок откако лидерот на ВМРО-ДПМНЕ, Христијан Мицкоски, одби да учествува, по што шефот на Владата истакна дека од решавањето на судбината на СЈО, чиј мандат завршува во септември, зависи и добивањето на Датум за преговори од ЕУ.