Хојт Ји: Пратениците кукавички беа нападнати, време е да се формира нова влада
Објавено во: Македонија 01 Мај, 2017
По завршувањето на средбите со сите политички лидери заменик државниот секретар на САД Хојт Брајан Ји ги испрати главните пораки пред медиумите со кои жестоко ги осуди нападите во Собранието и порача дека сега мора да се формира нова реформска влада, јавува НОВА.
– За жал, политичките лидери не беа во можност да формираат влада по изборите кои се признаени од целата меѓународна заедница. Уште позагрижувачки се последните инциденти во Парламентот, каде пратениците беа кукавички нападнати само затоа што одбраа нов собраниски спикер, изјави Ји, кој ги повика властите да ги истражат нападите и виновниците да одговараат.
– Веруваме дека важно е политичките лидери да ја сфатат сериозноста и да најдат начин, мнозинството во Парламентот да одбере влада. Ги разбираме грижите, а целата програма на Владата треба да се дебатира во Собранието, а не надвор од него. Чувствуваме дека е важно земјата да биде обединета и да има нова влада која ќе работи на реформите, порача Ји.
Тој го повтори ставот на САД, дека ќе работат со новиот собраниски спикер Талат Џафери, и потенцираше дека истото го соопштиле и ЕУ, НАТО и официјален Берлин.
– Треба да се даде шанса овој процес да продолжи со формирање влада, да се има програма, рече Хојт Ји меѓу другото.
Како што рече тој, жали што прогресот на земјата бил во застој поради политичката криза, но дека САД и понатаму останува посветен за интеграција на Македонија во Европа, како и на целиот Западен Балкан.