Хрватска на пат да ја замени куната со евро
Објавено во: Балкан 17 Декември, 2018
Хрватска наскоро ќе испрати писмо за намера за да го воведе еврото до Европската централна банка, пишува загрепски Вечерњи лист.
Прв чекор за замена на хрватската валута, куна, со евро е пристапувањето кон курсниот механизам ЕРМ 2, изјави гувернерот на Хрватската народна банка, Борис Вујчиќ.
- Покрај формалното изразување намера за пристапување кон курсниот механизам, во писмото ќе се опишат и сите активности коиги планираме за да бидеме веродостојна кандидатка. Пристапувањето кон ЕРМ2 се очекува да биде за околу една година по испраќањето на писмото со намери, значи во текот на 2020 година- рече Вујчиќ.
Сегашните членки на еврозоната најпрво ќе мораат да ја прифатат Хрватска како добра кандидатка. Единствено дополнително барање за влез во курсниот механизам е да се има блиска соработка со Единствениот надзорен механизам, а тоа се подразбира дека најдобрите хрватски банки ќе бидат под контрола на Европската централна банка.
- Со писмото за намера ќе се обврземе дека ќе спроведеме одредени дополнителни мерки од областа на економската политика за кои веруваме дека Хрватска и ќе ја направи веродостојна кандидатка. Спроведувањето на овие мерки ќе го еваулира Европската централна банка и Европската комисија, па нивната позитивна оценка ќе ни ја отвори вратата за испраќање на официјално барање за влез во курсниот механизам- изјаи Вујчиќ.