ХРВАТСКА ПОДГОТВЕНА ДА ГИ ЗАТВОРИ ГРАНИЦИТЕ: Изолирани лица поради коронавирус во Риека

Добивај вести на Viber

Хрватскиот министер за здравство Вили Берош изјавил денеска дека е извесно оти коронавирусот овие денови ќе се појави во Хрватска и додал дека таа земја е подготвена да ги затвори границите во било кој момент кога проценат надлежните, но дека во овој миг такво мислење не е потребно.

Берош порачал дека нема причини за паника бидејќи здравствениот систем е подготвен за се што треба да се преземе и потврдил дека сите тестови на хрватските државјани се негативни на КОВИД-19, јавија денеска хрватските медиуми.

-Во овој момент сите резултати се негативни, но со оглед на епидемолошката ситуација и број на примероци кои се уште во обработка, лесно е можно некој од нив да биде позитивен. Но тоа не треба да ја вознемирува јавноста бидејќи системот е подготвен. Дополнително се проверуваат луѓето кои се во изолација. Ако се случи некој да биде позитивен, ќе се фокусираме на тоа да бараме контакти-рекол Берош.

Освен наодите на седуммина пациенти кај кои имаше сомненија на коронавирус, а се покажаа негативни, во текот на ноќта во КБЦ Риека стигнале уште девет хрватски работници кои работеле во една фабрика во Италија, па поради престојот на сомнително подрачје веднаш се сместени во изолација, јави агенцијата Хина.

-Девет хрватски граѓани кои работеле во фабрика во Италија, каде се откриени дури 20-тина заболени, во текот на ноќта се транспортирани во КБЦ Риека каде се во изолација и под надзор, а брисевите се испратени на анализа во Загреб. Резултатите се очекуваат во текот на попладнето или подоцна во текот на денот-рекол Берош.

Тој тврди дека во овој момент нема сомнителни случаи, но дека здравствениот систем ја следи ситуацијата, ги детектира сите оние кои се сомнителни на хрватските граници и дека во овој момент ситуацијата е под контрола.

Хрватскиот министер за здравство, денес ќе отпатува во Рим кој е домаќин на состанокот на министри за здравство од соседните земји, посветен на сузбивање на коронавирусот, а на кој ќе се разгледува координиран одговор на епидемијата во северна Италија. Состанокот ќе ги собере министрите за здравство на Италија, Хрватска, Словенија, Австрија, Германија, Франција и Швајцарија а ќе се разговара за мерки кои се преземаат по повод коронавирусот.