И Грците ќе бараат нов договор?
Објавено во: Балкан 10 Декември, 2018
Нова демократија, како влада, ќе преговара за нов договор.
Јоргос Кумуцакос, одговорниот за надворешна политика во грчката опозициска партија Нова демократија вели дека ако Договорот од Преспа не дојде во грчкиот Парламент од оваа Влада, тогаш отвора пат за нови преговори.
Во интервјуто за грчкиот весник „Реал њуз“, тој изјави дека претседателот на партијата, Киријакос Мицотакис има кристално јасна позиција. Нова демократија нема да гласа за договорот, „ниту сега, ниту подоцна, ако Ципрас не го донесе во сегашниот парламент“, јави дописничката на МИА од Атина.
„Договор ослободен од секаков елемент што го одржува и храни историски неточниот иредентизам на Скопје и опасниот национализам на различни екстремни кругови. Добро знаеме дека таквите преговори ќе бидат исклучително тешки. Ќе се водат во неповолна меѓународна средина и ќе бидат оптоварени од претходното од Договорот од Преспа. Од она што не само што беше разговарано, туку и договорено од владата во заминување на СИРИЗА и Независни Грци “– вели Кумуцакос.
Во однос на изјавите на премиерот Заев што предизвикаа реакции во Грција, одговорниот за надворешна политика во Нова демократија, вели дека во договорот јасно пишува дека официјален јазик на втората страна ќе биде македонскиот јазик.
„Оние работи што писмено и јасно се споменати во Договорот од Преспа во член 1.3 „официјален јазик на втората страна ќе биде македонскиот јазик“. Односно во меѓудржавен договор, Грција се обврза да го прифати постоењето на македонски јазик и националност. За ова се договорија господата Ципрас, Коѕијас и Каменос. Не се поставува прашање на толкување. За да ги парафразирам зборовите на премиерот, Заев едноставно „живее” во текстот на Договорот од Преспа“ – вели Кумуцакос во интервјуто за грчкиот весник.
Премиерот Зоран Заев верува дека грчкиот премиер Алексис Ципрас ќе исполни се што е договорено во рамките на преспанскиот договор.
Тој на денешната дебата за предложените амандмани на Уставот што се одржа во Штип, забележа дека во духот на имплементацијата на Договорот со Грција, ќе се гради пријателство меѓу двете земји, а не непријателство.