„И Грујо не беше претседател на држава, затоа се пресели човекот“ - реакциите не престануваат

Добивај вести на Viber

„И Грујо не беше претседател на држава, затоа се пресели човекот“. 

Ова е една од бројните реакции на фејсбук и на твитер, каде не престануваат шеговитите досетки  на сметка на изјавата на претседателот Стево Пендаровски, дека и тој би се иселил да не е претседател на држава.

„Стево Пендаровски би се иселил од Македонија ако не бил претседател. Значи, за да останете, бидете политичари, оти за други живот нема. Сурово, но реално...“, се вели во една од реакциите на Фејсбук.

Друга порака, пак, на социјалната мрежа Фејсбук гласи, „Значи во ред претседателе, сите еден ден ќе заминеме“.

„Пендаровски, кога ќе си оди, нека го изгасне светлото во државава“, напишал еден од твитерџиите.

Друг, пак, пишува „Мотиватор од серијата се гледаме на врвот“.

А реакциите вчера почнаа веднаш откако претседателот Пендаровски ја даде таа изјава.

„Свечено испраќање на претседателот Стево на аеродром“, беше една од шегите што се појавија на социјалните мрежи, откако претседателот Стево Пендаровски, на младински форум во Нови Сад, рече дека со плата од 400 евра, и тој би се иселил од земјава доколку не е претседател.

На Фејсбук се формирала и група која е наречена „Свечено испраќање на претседателот Стево на аеродром“.

А во своето соопштение после изјавата, кое беше како еден вид дообјаснување од претседателот, стоеше дека неговата изјава дадена на Регионалниот младински форум во Нови Сад, не треба да се става во дневно-политички пресметки. Претседателот е на став дека одговорноста за иселувањето е на сите политички водства, вклучително и негова.

А што рече претседателот на Форумот?

„Тие имаат само еден живот, сите ние имаме само еден живот, и никој не е луд да го троши додека преговорите со ЕУ траат со години, при што просечната плата во мојата земја е 400 евра. Да не бев претседател, и јас ќе се иселев од мојата земја“, рече Пендаровски.