И службениците на МВР да ги почитуваат велосипедистите!
Објавено во: Македонија 18 Октомври, 2017
На семафорот пред ЕУ инфо центар, полициско возило, на пешачки премин, удри во велосипедист. Полициското возило свртело десно заобиколувајќи го триаголникот и го удрил велосипедот додека поминувал пешачки на зелено. Најважно од се - велосипедистот е во ред, информира иницијативата „НаТочак“.
Оттаму до МВР и министерот Оливер Спасовски упатуваат потсетување дека ова е еден во низата случаи за кои укажуваат на третманот на полициските службеници кон велосипедскиот сообраќај.
„Секојдневно сме сведоци на паркирани полициски коли на велосипедска патека, наместо службениците да се ангажираат во казнување на автомобилите кои го практикуваат тоа, тие самите ја загрозуваат безбедноста. Секојдневно сме сведоци на непрописно возење, прекршување правила и прописи од страна на полицијата, дури и кога нема пуштено ротациони светла, но општоприфатено е тоа да се толерира бидејќи - тие се полиција“, велат од „НаТочак“.
Тие од МВР бараат многу посериозен ангажман за овој системски проблем.
Ги повикуваат и РСБСП за едукација на службениците во однос на велосипедскиот и пешачкиот сообраќај бидејќи и велосипедистоте се сообраќај рамноправен со останатите.