И СТРУМИЧАНИ ДИШАТ ЗАГАДЕН ВОЗДУХ: Костадинов ќе го субвенционира инсталирањето на природен гас
Објавено во: Македонија 28 Декември, 2021
Струмичкиот градоначалник Костадин Костадинов на Фејсбук најави дека ќе ги субвенционира со 10 денари од кубен метар семејствата кои ќе одлучат да инсталираат природен гас за да се згреат.
Мерката ја најавува откако Струмица неколку дена по ред заедно со Скопје, и другите поголеми градови е екстремно загадена.
„Струмицо моја, слушни ме. Јас како поединец сам нема да го решам загадувањето на воздухот. Денеска предложив и Советот ја прифати една од најважните мерки, директна субвенција на цената на природен гас за домаќинствата. На секој потрошен кубен метар природен гас ќе добивате по 10 денари субвенција. Апелирам, користете ја мерката во наредната 2022 година, колку повеќе приклучоци толку почист воздух. Мораме да ја менуваме свеста, се работи за наше заедничко добро. Нека Струмица биде пример за цела држава па и пошироко. Од срце за Струмица“, објави Костадинов.
Моментално Кичево и Кавадарци се најзагадени градови во земјава.
Скопје синоќа беше меѓу најзагадените градови во светот.