ИБРАИМОВСКИ ЖАЛИ - не успеав да ве спасам од ропството на извршителите
Објавено во: Македонија 18 Февруари, 2020
На Самка Ибраимовски од ПЦЕР, кој се нарекува себе си социјален пратеник, иако упорно го туркаше, не му успеа народните избраници пред распуштањето да ги изгласаат измените на Законот за облигациони односи, чии предлагач беше токму тој.
А со овој закон што тој го предложи, требаше да се утврди застареност на долговите на граѓаните за 10 години од денот на нивната извршност. Односно, идејата беше граѓаните кои мака мачат со извршители, да се спасат од нив. Инаку, досега изршителите прогонуваа должници со сметки постари и од 20 години.
Пратеникот Ибраимовски на својот фејсбук профил напиша дека му е жал што законот не поминал до распуштањето на Собранието, поради другите поургентни закони.
Но, тој не се откажува од овој закон.
„Почитувани социјално загрозени граѓани, сиромашни граѓани, почитувани сите вие! За жал неуспеав законот што го предложив за облигациони односи во делот на застарувањето на долговите да се изгласа поради други закони кои беа на дневен ред пред распуштање на Собранието. Сепак, со ваша поддршка на изборите на 12-ти април, прво што ќе направам, е тоа да овој предлог закон повторно го предложам и да се изгласа, за вие почитувани граѓани да се спасите од ропството на извршителите - крвопијци и секако вашите сметки да не бидат повеќе блокирани. Ви благодарам за вашата поддршка во овој мој пратенички мандат. Вашиот социјален пратеник“, напиша Ибраимовски на фејсбук.
Инаку, предложените законски измени на Ибраимовски беа заглавени во собраниската процедура. Тие на стартот добија позитивно мислење од Владата, но потоа некаде работата се искомплицира низ собраниските лавиринти.
А од иницијативата „СТОП за извршителите” бараа застарувањето на долговите да биде и на пократок рок, бидејќи за нив донесувањето на овој закон ќе значи ослободување на дел од граѓаните, но само ако има ретроактивно дејство.