Идејата на Бујар Османи за професија Ковид-координатор ја пренесуваат и медиумите во регионот
Објавено во: Македонија 04 Јуни, 2020
Веста за предлогот на вицепремиерот Бујар Османи за воведување на „координатори на КОВИД“ кои ќе бидат назначени во компании и институции, што би било нова работа за оние „чија единствена задача би била да вршат надзор на примената на заштитни протоколи“ се прошири и во медиумите во регионот.
Османи ова го најави по средбата со претставниците на локалниот кризен штаб во Штип, каде што расте бројот на заразени со КОВИД-19, пред се во фабриките за текстил. „КОВИД-координаторите“, рече Османи, ќе го следат спроведувањето на санитарните препораки и мерки за заштита од вирусот корона и ќе комуницираат со локалната самоуправа.
Во секоја компанија, приватна или државна, и во секоја институција ќе мора да се отвори ново работно место за таканаречен ковид-координатор кој нема да работи ништо друго освен што ќе се грижи за спроведување на протоколите за справување со коронавирусот.
– Улогата на овие ковид-координатори нема да биде само да мерат температура, туку ќе биде многу покомплексна. Тие ќе мора да ги разбиваат групирањата на работниците, да разговараат со нив и да ги советуваат– рече Османи.