ИГОР СТЕФАНОВСКИ ИЏЕ И АКК СТЕФАНОВСКИ СО ШАМПИОНСКИ АМБИЦИИ ЗА СЛЕДНАТА СЕЗОНА

Добивај вести на Viber

Со последната трка во Чешка, заокружен е ФИА ЕТЦЦ шампионатот за 2017. Најдобриот македонски автомобилист Игор Стефановски Иџе и неговиот национален тим АКК Стефановски, се задоволни од она што го покажаа на овој шампионат.

Македонија со Игор Стефановски Иџе ја започна новата спортска историја во ЕТЦЦ натпреварувањата. За првпат на ФИА ЕТЦЦ 2017 дебитиравме со национална екипа. Поранешниот двократен светски шампион на ридски патеки, Иџе првпат оваа сезона возеше автомобил во сопственост на неговиот тим, АКК Стефановски, натпреварувајќи се под регистрацијата Македонија.

Во генералниот пласман, по последната трка на патеката Мост во Чешка, Стефановски има 60 поени и се најде на четвртото место. Тој и неговата екипа, се задоволни од постигнатиот резултат по шесте извозени трки оваа година. Тимот на АКК Стефановски амбициозно започна да ја подготвува следната сезона.

„Би сакал да се заблагодарам на сите кои во мојот тим го препознаа потенцијалот и не поддржаа за натпреварувањата за оваа сезона. Посебно би сакал да се заблагодарам на Агенцијата за млади и спорт, но и на сите други спонзори кои веруваа и во иднина ќе веруваат во нашиот потенцијал “ -порачува автомобилскиот ас. Тој и овојпат не ги крие своите шампионски амбиции, за кои верува дека ќе може да се реализираат уште следната година.