Илон Маск даде предлог како Русија и Украина да стават крај на војната
Објавено во: Свет 03 Октомври, 2022
Извршниот директор на вселенската компанија Спејсекс, Илон Маск има предлог за мир меѓу Украина и Русија во 4 точки.
Тој предлага да се повторат гласањата во припоените региони на истокот на Украина во кои Москва спроведе референдуми, но овој пат тие да бидат под надзор на Обединетите нации.
„Русија заминува ако тоа е волјата на народот’, напиша Маск на Твитер.
Додава дека според неговиот предлог Крим останува формален дел од Русија.
„Како што беше од 1783, до грешката на Хрушчов“, пишува Маск и додава дека водоснабдувањето на Крим би било обезбедено, имајќи предвид дека полуостровот има проблеми со снабдувањето со вода поради Киев.
Маск предлага Украина да остане неутрална, што е важно имајќи предвид дека земјата официјално поднесе барање за членство во НАТО.
Над милион луѓе гласале досега за овој предлог, некои се за, некои против. И дел од украинските функционери го споделија овој предлог на Твитер. Инаку, украинските трупи напредуваат кон Херсон.