Има ли спас за капиталните инвестиции, катастрофа и во вториот месец
Објавено во: Економија 26 Март, 2019
Само 3,53 отсто од предвидените капитални расходи за годинава биле потрошени до крајот на февруари годинава. Февруарскиот извештај за реализација на буџетот покажуваат дека динамиката на слаба реализација на овие трошења која траеше цела мината година продолжува и годинава. Ако во јануари властите успеаја да потрошат 1,1 отсто од предвидените пари, до крај на вториот месец процентот пораснал само до 3,53 проценти. За споредба сите останати буџетски ставки и на приходната и на расходната страна се реализирани со процент од околу 15 отсто што е и очекувано, ако се планира комплетна реалзиација на планот.
За годинава Владата предвиде да потроши од буџетот над 422 милиони евра за капитални проекти. Тоа се пари кои се трошат за значајна инфраструктура, за изградба на патишта, болници, училишта, градинки. Сепак впрочем како и во минатото и покрај предвидувањата, парите не се трошеа во целост. Минатата година реализацијата беше катастрофална и покрај ребалансот, сега годината повторно почна лошо. Од парите потрошени се само едвај 15 милиони евра или точно 3,53 отсто.
Податоците за
извршување на буџетот од друга страна покажуваат солидна реализација на
приходите и на расходите. На расходната страна реализирани се над 14 отсто од
планираните трошоци. И приходите се со речиси идентична реализација, или
заклучно со вториот месец собрани се 14,2 отсто од предвидените приходи. Во
овој дел и во јануари имаше голем скок на неданочните приходи. Имено тие за два
месеци се реализирани во целост и дополнително уште 40 отсто над проекцијата
или вкупната реализација за два месеци е 139 отсто.
Претходно Народната банка објави дека ова се должи на пензиската реформа
односно префрлувањето на дел од членовите на приватните пензиски друштва од
вториот столб единствено кон државниот ПИОМ
Владата најави дека годинава ќе биде економска година, а градежништвото повторно ќе биде мотор на растот. Тоа треба да ги набилда и капиталните инвестиции, но останува да се види дали тоа навистина ќе биде така. Засега бројките не докажуваат.
А.Т.