ИМА ПОВРЕДЕНИ: Нападната американската амбасада во Ирак
Објавено во: Свет 27 Јануари, 2020
Три ракети синоќа ја погодиле Амбасадата на САД во Багдад, Ирак, при што има тројца повредени.
Од петте испалени ракети, три паднале директно врз зградата на амбасадата. Една од нив паднала на кантината, каде во тој момент имало вечера.
Веста ја пренесе ирачката државна телевизија, повикувајќи се на извори во ирачките безбедносни служби.
Според САД, последниот инцидент претставува ескалација на серијата ракетни напади и го повикаа Ирак да ги заштити американските дипломатски објекти.
„Од септември досега има повеќе од 14 напади од страна на Иран и неговите поддржувачи врз персоналот на САД во Ирак. Безбедносната состојба останува напната, а вооружените групи поддржани од Иран остануваат закана. Ние остануваме будни“ - велат од Стејт департментот.
Иранскиот претседател Хасан Рохани, обраќајќи се до јавноста, рече дека не смеат да дозволат, терористите од Белата куќа да го изолираат Иран.
„Иранците не смеат да дозволат, политиката на американскиот претседател, Доналд Трамп за „максимален притисок“, врз Техеран, да го нарушува единството на нацијата пред парламентарните избори. Не треба да дозволуваме Доналд Трамп да создава јаз меѓу власта и луѓето. Треба да останеме обединети“ - изјави Рохани.
Ова е втор напад врз амбасадата за период од една седмица, но ова е првпат ракета да падне директно врз објектот.