ИМААТ ЗАЕДНИЧКИ ИНТЕРЕС: За што разговараа Путин и Макрон?
Објавено во: Свет 18 Мај, 2017
Рускиот претседател, Владимир Путин го имаше првиот телефонски разговор со францускиот претседател, Емануел Макрон кој неодамна стапи на функцијата.
Путин му честиташе за победата и инаугурацијата.
Од прес-службата на Кремљ информираат дека лидерите на двете страни се договорија заеднички да работат на актуелните меѓународни прашања и изразиле подготвеност да ги развиваат пријателските односи.
„Изразена е заемна подготвеност да се развиваат традиционално пријателските руско-француски односи во политичката, трговско-економскта, културно-хуманитарната и другите сфери“ - се вели во соопштението кое го пренесува РИА „Новости“.
Тие зборуваа за неопходноста од заедничка борба против тероризмот.
Путин и Макрон ја потенцираа важноста на понатамошната соработка за решавање на украинската криза во рамките на „Нормандискиот формат“ врз основа на „Минската спогодба“.
Претседателите на двете земји, исто така дискутираа за можноста од претстојни лични контакти.