ИНИЦИЈАТИВА ДО УСТАВЕН: ВМРО-ДПМНЕ апелира да донесе одлука со која го укинува Законот за употреба на јазиците
Објавено во: Македонија 21 Јануари, 2019
Генералниот секретар на ВМРО-ДПМНЕ Игор Јанушев, вели дека Законот за употреба на јазици е противуставен.
Според него, тој е донесен во нелегална процедура и е штетен. Oд партијата поднесоа иницијатива до Уставниот суд за оценка на уставноста на Законот за употреба на јазиците.
ВМРО-ДПМНЕ апелира Уставниот суд да одлучи со најголема итност и да донесе одлука со која го укинува Законот за употреба на јазиците.
„ВМРО-ДПМНЕ бара од Уставниот суд донесување на времена мерка – запирање на извршувањето на поединечните акти или дејствија што се преземаат врз основа на Законот за употреба на јазиците и Указот за прогласување на истиот, чија уставност се оспорува, од причина што доколку започне да се применува постои ризик од настанување на штетни последици“, изјави Јанушев.
Јанушев рече дека Указот за прогласување на Законот за употреба на јазиците е објавен само со потпис на собранискиот претседател, Талат Џафери и без потпис на претседателот на државата Ѓорѓе Иванов, што било во спротивност со Уставот.
Од СДСМ го тврдат спротивното. Тие реагираа денеска дека не е точно дека Законот за употреба на јазиците е неуставен како што тврди ВМРО-ДПМНЕ. Од СДСМ по поднесената иницијатива за оцена на уставноста на Законот од страна на опозициската партија наведуваат дека законот ја регулира употребата на албанскиот јазик кој во Македонија е втор официјален јазик уште со амандманите на Уставот од 2001 година.
Tврдат дека објавувањето на законот во „Службен весник на РМ“ без потписот на претседателот Иванов, е поради тоа што тој го прекршил Уставот, затоа што бил должен да го потпише Указот за прогласување на законот доколку е донесен по втор пат со потребното мнозинство во Собранието.