Институциите повеќе нема да можат да кријат информации
Објавено во: Финансии 26 Јули, 2018
Криењето на информации на институциите повеќе нема да биде пракса, бидејќи и на локално и на државно ниво тие ќе имаат обврска да објавуваат податоци за своето работење.
Ова се предвидува со првата Стратегија и Акциски план за отворени податоци за која денеска детали изнесе министерот за информатичко општество и администрација Дамјан Манчевски.
Манчевски кажа дека секоја институција ќе треба да има посебен офицер за отворени податоци, кој ќе биде задолжен да ги обајвува податоците во соодветна форма. За таа цел во изработка е и посебна веб-страна data.gov.mk каде овие податоци ќе бидат бесплатно достапни за граѓаните.
Според Манчевски, отворените податоци можат да бидат силен поттик за социјален и економски развој, и да се искористат и за подобрување на управувањето преку зголемување на транспаретноста, на отвореноста, на интегритетот и на јавното учество и во локалната и во централната власт.
„Ова треба да доведе и до подобрување на испораката на податоци и до ефикасност на јавниот сектор, ќе го зголеми учеството на граѓаните и позитивно ќе влијае врз борбата со корупцијата, но исто така со малку иновативност може да биде и шанса за отворање на нови бизниси“, рече министерот додавајќи дека се работи на мета податоци кои ќе бидат ставени во функција и кои ќе бидат користени за анализи и за обработки.