Вејсели на денешната прес-конференција рече дека решението на судијката е скандалозно и донесено е врз основа на фалсификувани документи и обвини дека зад оваа судска одлука стои Заев.
„Судијката Сузана Дончевска има донесено решение за смена на поглаварот на ИВЗ и именување друг врз основа на фалсификувани документи. Толку наивна судијка, донела решение со фалсификати и тоа се гледа од Јупитер. На оваа власт ѝ требаат вакви скандали за да ги покријат нивните скандали и незадоволството на граѓаните. Владата во име на една судијка изврши пуч во ИВЗ. Ова е пуч од Зоран Заев”, изјави Вејсели.
Тој тврди дека тие како членови на Ријасетот воопшто не биле информирани дека Реџепи си дал оставка и дека воопшто не била одржана вонредна седница за смена на Реисот. Оние кои биле потпишани на записникот тврди дека не биле членови на Ријасетот, ниту вработени во ИВЗ.
„Судијката веќе доставила и барање за смена на раководството и во Централниот регистер. Дали имаме работа со правда, ова се ненормални судии, тие треба да бидат во зоолошка“, вели Вејсели.
Тие ги отфрлаат одлуките на судот и тврди дека со ова е направен упад во автономијата на ИВЗ.
„Бараме од владата на Зоран Заев да се извинат. Ова на премиерот не му се простува, треба да биде внимателен што прави со политичките хулигани околу него. Ние како ИВЗ сме спремни да се соочиме јавно со Владата на Заев“, порача Вејсели.
Според него, „во оваа влада може да има сѐ, но само судство не може да има”, како и дека покорумпирано судство од ова немало во историјата, од 1991 година па наваму.
„Го споменуваме Заев, го споменуваме и министерот за внатрешни работи Оливер Спасовски, а директорот за односите со верски заедници не го признаваме“, изјави Весели.
