Издадено предупредување за можни терористички напади за време на Евровизија
Објавено во: Свет 14 Мај, 2019
Можни се терористички напади во Израел за време на Евровизија.
Американската амбасада во Израел објави безбедносно предупредување до сите американски граѓани во земјата.
Предупредувањето е објавено синоќа, пред годишнината од отворањето на американската амбасада во Ерусалим, кое се совпаѓа со неделата на натпреварот за песна на Евровизија.
Ги повикаат Американците да бидат внимателни и да не патуваат во области што биле цел на ракетен напад од Појасот Газа во неодамнешната ескалација на насилството меѓу Хамас и израелската армија.
„Терористичките групи може да ја изберат годишнината, која се совпаѓа со евровизискиот натпревар (14-18 мај) во Тел Авив и Денот Накба (15 мај) за вршење напад или насилни протести“, стои во соопштението објавено на официјалната веб-страница на Амбасадата.
Во Израел на 12 мај официјално е отворена неделата на Евровизија во Тел Авив и илјадници полицајци, болничари и друг персонал се сместени во Евровизиското село затоа што се очекува 300.000 луѓе да го посетат градот.
Палестинските фракции во Газа мобилизираат луѓе за марш кон границата на Израел на 15 мај, кога Палестинците ја одбележуваат Накба („катастрофа“), како што го нарекуваат создавањето на Израел во 1948 година.
Палестинското движење Исламски џихад од Појасот Газа на 5 мај се закани дека ќе го спречи одржувањето на изборот за Песна на Евровизија.