Изложба на креативните акции кои го менуваат општеството на подобро

Добивај вести на Viber

Преку изложени фотографии, реквизити, транспаренти и други елементи кои биле дел од различните граѓански акции за промени во општеството во земјава во изминатите десетина години, изложбата насловена „Креативен активизам“ го прикажува еволутивниот развој на овој вид активности во земјава. Изложбата, која беше отворена синоќа во мобилната галерија во Паркот на Франкофонијата во Скопје, на едно место ги собра учесниците и организаторите на креативните граѓански акции, различните граѓански здруженија, но и сите љубопитни граѓани кои сакаа да ја видат спрегата на уметноста и активизмот и промените што таа ги иницира во општеството.

Изложбата е дел од програмата за одбележување на 25-годишнината од основањето на Фондацијата Отворено општество – Македонија (ФООМ). Како што истакнуваат организаторите на изложбата, таа го отсликува креативниот активизам во Македонија кој почна со мали, безопасни, но исклучително креативни акции пред десетина години и кои означија нова ера на граѓанскиот активизам во Македонија. Во рамки на оваа изложба може да се видат фотографии и реквизити од протестот против изградба на црквата на плоштадот „Македонија“ во Скопје, протестите против полициската бруталност кои почнаа по убиството на Мартин Нешкоски, акцијата „Го сакам ГТЦ“ насочена против менувањето на ликот на Градскиот трговски центар во Скопје, Шарената револуција и многу други помали и поголеми акции и активности.

На оваа изложба посетителите може да се информираат и за многубројните здруженија, коалиции и иницијативи кои со своите активности придонесуваат за различни промени во општеството, како што се неформалната група Прва архибригада (ПАБ) којаго крена својот глас против штетните урбанистички промени и архитектонски тенденции промовирани од Владата преку проектот „Скопје 2014“, иницијативата „На точак“ насочена кон подобрување на велосипедската инфраструктура во Македонија, еколошката акција „Скопје смог аларм“ која се бори против аерозагадувањето во Скопје, коалицијата „Маргини“ чии активности се насочени кон подобрување на правата на маргинализираните групи во земјава и др.

- Целта на оваа изложба е да ја прикаже креативната страна на граѓанскиот активизам и неговата еволуција, со која активистите мораа да се служат за да ги анимираат јавноста и медиумите, да ги мобилизираат свесните и да ги освестат неосвестените – велат организаторите на изложбата.

Изложбата „Креативен активизам“ ќе биде поставена во Мобилната галерија во Паркот на Франкофонијата и во следните неколку денови.