Израелски министер од Париз порача дека Палестинците не постојат
Објавено во: Свет 20 Март, 2023
Израелскиот министер за финансии Безалел Смотрич одржа говор во Париз каде го негираше постоењето на Палестинците. Тој вели дека поимот за палестински народ е вештачки.
„Не постои такво нешто како палестинска нација. Нема палестинска историја. Нема палестински јазик“, рече тој во Франција.
Министерот се обрати на говорница обложена со нешто што изгледаше како карта на Израел, која ги вклучува окупираниот Западен Брег и делови од Јордан.
Палестинскиот премиер Мохамед Штајех изјави дека забелешките на Смотрич се „убедлив доказ за екстремистичката, расистичка ционистичка идеологија која управува со партиите на актуелната израелска влада“. Смотрич има историја на навредливи изјави против Палестинците. Минатиот месец тој повика палестинскиот град Хавара на Западниот Брег да биде „избришан“ откако радикалните еврејски доселеници дивееја низ градот како одговор на нападот со пукање во кој загинаа двајца Израелци. Смотрич подоцна се извини по меѓународната осуда. Во Појасот Газа често има вооружени инциденти помеѓу Палестинците и израелската армија.