ИЗВОЗОТ РАСТЕ: Тргуваме со три соседи, но која земја е број еден?
Објавено во: Економија 05 Декември, 2019
Oд јануари до октомври годинава, според вкупниот обем на надворешнотрговската размена, земјава најмногу тргувала со Германија, Велика Британија, Грција, Србија и Бугарија.
Како што објави Државниот завод за статистика, вкупната вредност на извозот на стоки изнесува 329 424 006 илјади денари и има пораст од 10.8 отсто во однос на истиот период лани. Вредноста на увезената стока, во периодот јануари – октомври 2019 година, чини 425 554 435 илјади денари, што е за 9.8 отсто повеќе во споредба со истиот период од претходната година.
Трговскиот дефицит, во периодот јануари – октомври 2019 година, изнесува 96 130 429 илјади денари.
Покриеноста на увозот со извоз, во периодот јануари – октомври 2019 година, изнесува 77.4 осто.
Трговската размена по производи покажува дека во извозот најголемо е учеството на катализаторите на носачи со благородни метали или нивни соединенија, сетовите на проводници за палење и слично, за возила, авиони или бродови, деловите на седишта од подгрупата 821.1 и фероникелот.
Увезуваме платина и легури на платина, необработени или во прав, други метали од платинската група и нивни легури, необработени или во облик на прав, нафтените масла и маслата добиени од битуменозни минерали (освен сурови) и керамичките производи за лабораториска, хемиска и индустриска употреба.
Претходниот квартал во топ пет трговски партнери ја немаше Бугарија, а ја имаше Италија.