Извршител преку оглас го бара управителот на 1ТВ
Објавено во: Македонија 21 Октомври, 2019
Извршителот Благоја Каламатиев од Скопје преку оглас го бара управителот на 1ТВ за да дојде во неговата канцеларија и да подигне налог за наплата. Барањето за извршување е од доверителот кој во овој случај е Комитетот за мерење на публиката во Република Македонија. Трговското друштво 1 ТВ договорот за мерење на публиката го потпишал на 4 септември 2018, а налогот за наплата на побарувањата е од 10 октомври.
Комитетот за мерење на публиката е основан по иницијатива од Агенцијата за аудио и аудиовизуелни медиумски услуги, а нејзини членови се и националните телевизии, јавниот сервис, маркетинг агенции и асоцијација на огласувачите, а основна дејност му е да избира агенции кои истражуваат структурата и профилот на домаќинствата и спроведува мерењата за гледаноста на програмите. Не е позната сумата што се должи, ниту колку чини целокупното извршно решение.
Летоска АВМУ едногласно донесе одлука да поведе постапка за утврдување дали постои повреда на забраната за таен сопственик на радиодифузерот 1ТВ. Според Централниот регистер 1ТВ е во 100 отстотна сопственост на “БЈМ Медиа Груп” што е во сопственост на Миле Јовановски, таткото на Бојан Јовановски, инаку првообвинет во случајот „Рекет“.. Законот за медиумски услуги забранува тајно сопствеништво на радиодифузерите. Инаку, пензионерот Богдан Дамјаноски кој само што беше објавено дека пред Управата за јавни приходи се претставил дека има намера да биде новиот сопственик на телевизијата, набрзо се повлече од своите намери. Дамјаноски рече дека инвеститорот во чие име настапува се премислил, бидејќи првичниот договор бил на помала цена, но откако УЈП ја блокирала сметката за неплатени даноци, сумата се зголемила на околу 400.000 евра. Инвеститорот, чие име не сакаше да го открие, бил негов пријател кој живеел во Холандија и сакал да почне бизнис во Македонија. Првата опција била да ја купи телевизијата на Боки 13. Договорот за купување на уделите во БМЈ Медиа груп, фирмата која е сопственик на 1ТВ, Дамјаноски го склучил минатата недела со сопствениците Миле Јовановски, татко на Бојан Јовановски, и Јасна Мандиќ пред тие да бидат приведени. Тоа бил интерен договор кој се уште не бил спроведен во институциите. Дамјаноски тогаш се појавил во телевизијата и имал разговори со дел од вработените и склучил договори за работа со ветување дека ќе им бидат исплатени и заостанатите плати.