Извршувањата запрени до 30 јуни
Објавено во: Македонија 25 Март, 2020
Ваква одлука донесе Владата, со која до 30 јуни ќе се
запре примената на Законот за извршување, освен доколку со оваа уредба со
законска сила не е поинаку уредено.
Одлуката на Владата утврдува дека извршителите се должни да запрат со преземање
на било какви извршни дејствија, освен во предметите за побарувања врз основа
на законска издршка, со распределба на средствата пристигнати на нивните
посебни сметки, доколку за тоа се исполнети законските услови, како и со
дејствијата кои следат по наплатата на средства од должникот, успешно
спроведени јавни надавања, или продажби со непосредна спогодба.
Уредбата утврдува дека работодавците на должниците, Фондот за пензиско и
инвалидско осигурување на РСМ и носителите на платен промет се должни да
запрат со постапување по издадените налози од страна на извршителите, во
периодот определен со Член 1 на оваа Уредба, односно до 30 јуни 2020 година.
„Основните судови во Република Северна Македонија, се должни да донесат одлуки
по поднесените приговори за незаконитости при извршувањето врз основа на Член
86 од Законот за извршување, а Апелационите судови по поднесените жалби против
решението на судот по приговор врз основа на член 87 од Законот за
извршување, со цел да се создадат услови за непречена распределба на средствата
пристигнати на посебните сметки на извршителите“, информираат од Владата.