Јовановиќ: Кај нас има нехумана нееднаквост, а таа не се решава без прогресивен данок

Добивај вести на Viber

Бранимир Јовановиќ, поранешниот советник на екс министерот за финансии Драган Тевдовски жестоко ја критикува власта за замрзнувањето на прогресивниот данок. Во емисијата „А што не е јасно“ на телевизијата Алфа, тој рече дека само во првите девет месеци од годинава приходите од персоналниот данок се зголемиле за 27 милиони евра, што е повеќе од планираната сума од 25 милиони евра за цела година, а тоа е резултат на прогресивното оданочување. Во дебата со советникот на премиерот Фатмир Битиќи, тој кажа дека ова било направено на барање на бизнис заедницата.

„Тоа намерно го направивте на барање на бизнис заедницата. Претходниот министер беше сменет без никаква јасна причина и без јавно образложение, а и премиерот кажа дека тој одлично си ја вршел работата. И ја донесовте новата министерка без никакво искуство и без експертиза од областа, директно од Стопанската комора“, рече Јовановиќ. 

Според него, со прогресивниот данок не биле погодени малите фирми, бидејќи таму нема плати над 1.500 евра, туку големите компании, бидејќи кај нив и кај банкарите се високите плати. 

„Во земјава има нехумана нееднаквост, таа не може да се реши со друго освен со прогресивниот данок“, рече Јовановиќ. Тој додаде дека заедно со членови од Владата протестирал за поправедно општество, и не му е јасно зошто тие од тоа отстапуваат. 

Според него, половина од европските држави што го имале воведено рамниот данок, потоа го напуштиле.

Според Јовановиќ, бесплатен ручек нема, а тоа значи дека зголемените пензии и плати ќе мора некој да ги плати, а тоа ќе се рефлектира преку зголемувањето на јавниот долг. „Него ќе го враќаат нашите деца, а не политичарите од Будимпешта што го зголемија најмногу“, рече Јовановиќ.

За зголемувањето на пензиите тој предупреди дека ќе ја зголемат дупката во Пензискиот фонд. „Сиромаштијата кај пензионерите е најниска, 7 отсто, а кај вработените таа е повисока, 9 проценти. Јас не сум против зголемување на пензиите, и јас сметам дека треба да растат, ама не требаше први, туку последни“, рече Јовановиќ.