Јовески ги чека предметите, СЈО денес ќе каже што понатаму

Добивај вести на Viber

Специјалното јавно обвинителство денеска треба да одлучи, односно да соопшти во јавност како ќе постапува понатаму со своите предмети откако државниот јавен обвинител Љубомир Јовески испрати барање со кое редовното обвинителство потврдува дека е подготвено да ги превземе сите предмети на барање на специјалната обвинителка Катица Јанева.

СЈО вчера претпладне го доби дописот на нивна адреса, што до нив го испрати Јовески за префрлање на предметите и како што потврдија за МИА од Специјалното обвинителство, тие во текот на денот ќе излезат со соопштение за натамошните чекори.

Јовески вчера рече дека Обвинителството е подготвено и има капацитет да постапува по сите кривично правни предмети од СЈО и оти се надева дека процесот ќе тече брзо. Како што најави тој, по преземањето на предметите и евентуално донесување на Законот за јавно обвинителство, ќе се одлучи кои обвинители ќе постапуваат по предметите со што не е исклучена можноста и досегашните од актуелното СЈО да постапуваат по предметите.

- Следи взаемно договарање околу техничките детали за предавање на предметите, моментот и редоследот. Обвинителството е подготвено, има капацитет да постапува по сите кривично правни предмети. По пристигнување на предметите и нивно распределување по обвинителствата, постапувањето од страна на ЈО ќе тече согласно законските надлежности. Се надеваме дека процесот ќе тече брзо, наведе вчера Јовески за МИА.