Јовески потврди дека писмата од Јанева се без печат, опозицијата бара што побрзо разрешување

Добивај вести на Viber

Државниот јавен обвинител Љубомир Јовески вели дека за кореспонденција се сметаат и писма без печат, бидејќи во моментов специјалната обвинителка Катица Јанева е во притвор и нема можност истите да ги завери. Комуникацијата помеѓу Јовески и јанева се одвива заради превземање на предметите на СЈО од страна на редовното обвинителство.

Ова за Пресинг ТВ го тврди Јовески, сметајќи дека нема ништо во тоа да се праќаат „празни“ писма, бидејќи и тоа е начин на комуникација. Досега Јанева, која е осомничена за вмешаност во случајот „Рекет“, испратила три писма со различни датуми.

Кореспонденцијата на специјалната обвинителка со СЈО и ОЈО се одвивала преку истражниот судија. Се уште не е јасно дали писмата на специјалната јавна обвинителка се архивирани. Јовески вчера изјави дека трите дописи на Јанева се напишани рачно.

„Талат Џафери треба итно, за денес, да ја свика седницата за разрешување на Катица Јанева, за да има време Советот на Јавни обвинители да ја донесе конечната одлука. Секое одложено закажување на седница за утре значи спасување на Катица Јанева и прикривање на рекетот и уцените“, напиша пратеникот на ВМРО-ДПМНЕ на Твитер.

Oпозициските пратеници v;era на седница на Собранието веќе поднесоа предлог точка за разрешување на Јанева. Сепак, овој предлог не поминал со 58 гласови против од страна на владејачкото мнозинство.

Пратеникот Антонио Милошоски кој е дел од работната група на ВМРО-ДПМНЕ за новиот закон за ЈО смета дека Јанева за десетина дена ќе биде префрлена во куќен притвор.

„Заев најави дека за десетина дена Јанева од Шутка ќе се префрли во куќен притвор. Како може премиерот да ги знае одлуките на Судот пред да бидат донесени“ – праша Милошоски изнесувајќи став за последната лидерска средба.