Југ: Секој си ги извади своите, а во притвор останавме само ние жртвените јагниња
Објавено во: Македонија 11 Декември, 2018
Дали може да заклучиме дека секој си ги извади своите, а во притвор останавме само ние жртвените јагниња, рече денеска во суд, обвинетиот за настаните од 27 април лани, Игор Југ.
Обвинетите за насилствата во Собранието на 27 април, Јане Ченто и Игор Југ му поставуваа прашања на поранешниот собраниски претседател, Трајко Вељаноски кој денеска сведочи за крвавиот четврток.
Обвинетиот Југ праша дали пеењето на албанската химна било увертира за крвавиот четврток, а Вељаноски одговори дека тој ден имало многу настани.
„Не беше само еден настан тој ден, беше пресот на Заев и други настани и не мислам дека немилите настани беа предизвикани од само еден настан“, рече Вељаноски.
Југ праша дали тие што скапуваат по затворите беа само кукли, а политичарите ја водеа играта.
Вељаноски не одговори прецизно, но се согласи дека „политиките ги водат политичарите“.
Ченто го праша Вељаноски дали, ако не беа отворени вратите во Собранието, масата ќе можеше да влезе, но Вељаноски не даде конкретен одговор.
Ченто праша и дали некој го известил Али Ахмети да замине од Собранието затоа што знаел дека нешто ќе се случува, Вељаноски кажа дека тој ден само Ахмети не бил во Собрание. Ченто праша и дали виновник за она што се случувало на 27 април се политичките елити кај кои, како што рече не преовлада разумот за мирна транзиција на власта за да си ги заштитат удобните фотељи, Вељаноски рече дека не може како сведок да одговори на ова прашање.