Јутјуб го суспендираше каналот Скај Њуз Австралија на Руперт Мардок, причина се дезинформации за короната и вакцините

Добивај вести на Viber

Јутјуб денеска објави дека го суспендирал ТВ каналот Скај њуз Австралија од својата платформа за размена на видео за една недела поради лажни информации за ковид-19.

Ова се случи врз основа на анализа на снимка објавена од тој ТВ канал во сопственост на медиумскиот магнат Руперт Мардок.

„Имаме јасна политика за лажни информации за Ковид-19 (…) со цел да спречиме ширење лажни информации за коронавирус што можат да му наштетат на светот“, се вели во соопштението на Јутјуб.

Со 1,86 милиони претплатници на YouTube, каналот, кој е во сопственост на огранок на медиумската група на Мардок „News Corp.“, го следат луѓе далеку од Австралија.

Неговите објави, од кои некои го доведуваат во прашање само постоењето на пандемија и ефективноста на вакцините, се широко споделени на социјалните мрежи низ целиот свет.

Пред три дена, каналот објави колумна во која водителот, познат по противењето на здравствените ограничувања, особено ја критикуваше одлуката на властите да ја продолжат мерката „затворање“ во Сиднеј.

Скај њуз потврди дека е привремено блокиран од Јутјуб, а портпаролот рече дека каналот „поддржува дискусии и дебати за различни теми и гледишта, што е од витално значење за секоја демократија“.

„Ние сериозно ја сфаќаме нашата посветеност да ги исполниме очекувањата на редакцијата и заедницата“, додаде тој.

YouTube има три вида казни за прекршувања: првата е суспензија од една недела, потоа две недели за повторување на прекршокот во рок од 90 дена и конечно трајно отстранување од платформата.

Поранешниот американски претседател Доналд Трамп беше суспендиран од „Јутјуб“ на почетокот на 2021 година.

Видео платформата YouTube е во сопственост на Alphabet, матичната компанија на Google.