Како хрватските власти ја коментираат пресудата за Караџиќ?
Објавено во: Балкан 20 Март, 2019
Владата на Хрватска денеска ја поздрави пресудата за првиот претседател на Република Српска, Радован Караџиќ.
Официјален Загреб оцени дека врз основа на доказниот материјал и другите пресуди би требало да се поврзе и со политичкиот и воен врв на тогашна Сојузна Република Југославија, под водство на Слободан Милошевиќ.
Во соопштението од кабинетот на премиерот Андреј Пленковиќ се наведува дека пресудата за Караџиќ „е уште една причина за соочување со минатото и отфрлање на големосрпската политика и идеологија, чии основни цели како и методи во оваа пресуда се означени како злосторство против човештвото“.
Хрватската Влада изрази жалење што Караџиќ, освен за Сребреница не е осуден и за геноцид во другите општини во Босна и Херцеговина.
Во соопштението се наведува дека Жалбениот совет „ја потврди личната одговорност на Радован Караџиќ за некои од најстрашните злосторства по Втората светска војна, како геноцидот во Сребреница, кога се убиени над 7.000 мажи и момчиња Бошњаци или опсадата на Сараево, ќе пружи барем минимална сатисфакција на жртвите и нивните семејства“.
Жалбениот совет на Меѓународниот резидуален механизам за кривични судови, наследник на Хашкиот трибунал, денеска, по три години жалбена постапка, ја изрече второстепената пресуда на поранешниот лидер на босанските Срби, Караџиќ.
Судскиот совет на Хашкиот трибунал во март 2016 година го осуди Караџиќ на 40 години затвор за геноцид во Сребреница и злосторства извршени против човештвото во Босна и Херцеговина од 1992 до 1995 година.