Како судските предмети се местеле под рака: Обвинение за Панчевски
Објавено во: Македонија 09 Јули, 2019
Го правеа АКМИС за да ги дели предметите по случаен избор, но Владимир Панчевски ги местел сам. Ова е дел од обвинението за поранешниот претседател на Кривичен суд за кого се тврди дека вака поделил дури 50 судски предмети. Меѓу нив и два на Специјалното јавно обвинителство. „Насилство во Центар“ во кој е обвинет поранешниот премиер, бегалецот Никола Груевски го дал кај Татјана Михајловска додека на Лидија Петровска и припаднал Тврдина 2 - случајот во кој му се судеше на контраразузнавачот Горан Грујевски и на вработените од УБК.
„Обвинетиот со ставање на писмен „параф“ од негова страна и со усно задолжување на вработени во судската писарница кои имале пристап во АКМИС системот, давал наредба да распределуваат конкретни предмети меѓу судиите надвор од времето на приемот на предметот во судот, како и насока на кој судија да се распредели предметот.“ - велат од ОЈО.
Засега не се бара притвор од Панчевски, а за него е отворена постапка и од Судскиот совет. Тој цело време тврди дека случајот против него е политички монтиран.