Кирацовски: Дедото ме послуша, нема повеќе да работи таму
Објавено во: Македонија 20 Февруари, 2019
Пратеникот Александар Кирацовски објави дека таткото на неговата сопруга Борис Поповски нема повеќе во Фабрика за опрема и делови во Битола која кај рудникот во Суводол е формирана како подружница на АД ЕЛЕМ.
Објавата на секретарот на СДСМ доаѓа по повикот од премиерот Зоран Заев да се преиспитаат сите новововработени роднини, сватови, сопрузи и блиски на функционери во државни институции.
„Побарав таткото на мојата сопруга, Борис Поповски, да го повлече својот ангажман како алатничар и тој прифати. Иако можеби немам право на тоа, затоа што немам ниту поврзаност со неговите ангажмани во животот. Од морални причини, таткото на мојата сопруга, кој беше ангажиран времено, на одреден период, преку Агенција за времени вработувања, го откажа својот ангажман во Фабриката за опрема и делови во Битола“, напиша Кирацовски.
До сега оставки поднесоа и блиски на уште двајца пратеници - мајката на Костадин Костадинов и синот на Горан Мисовски.
АД ЕЛЕМ е јавното претпријатие кое засега предничи по нови вработувања на блиски на пратеници и министри.