Кирацовски демантира дека има „нова хациенда“
Објавено во: Македонија 19 Јуни, 2019
Пратеникот и поранешен генерален секретар на СДСМ, Александар Кирацовски, демантира дека има „нова хациенда“ и најави тужби за Вечер, Нетпрес, Курир, Република и Денешен.
„Фамозната "хациенда" е семејна куќа изградена од 2013\ 2015 год. (а НЕ кога јас сум на општествена функција) на локација која е еден век во сопственост на мојата фамилија, од секој аспект основана и пријавена во Антикорупциска комисија“, напиша Кирацовски на својот профил на Фејсбук.
Вели дека како пратеник размислува во Собранието да покрене сериозна иницијатива за законско решение „со кое ќе се стави крај на создавањето на лажна претстава за реалноста“
- Секоја информација ќе мора да се провери пред да се објави, а доколку се стори спротивното, одговорноста ќе биде повеќекратна. Таквото законско решение е од интерес на граѓаните, затоа што тие одлучуваат и никогаш не смее да бидат доведени во заблуда од било какви "центри на моќ" чии што цели се спротивни од граѓанските, додава Кирацовски.