Ќе бидат ангажирани со договор на дело, надоместот не е објавен: Излезе огласот за попишувачи
Објавено во: Македонија 23 Февруари, 2021
Државниот завод за статистика денес го објави Конкурсот за пријавување на кандидати за реонски попишувачи и реонски инструктори кои во периодот 1-21 април ќе го спроведуваат попишувањето на терен во рамките на Пописот 2021. Како што информираа од Државниот завод за статистика на конкурсот можат да се пријават сите полнолетни државјани на Северна Македонија кои се невработени, кои имаат завршено најмалку средно образование и имаат компјутерски вештини.
Во огласот кој е објавен во неколку дневни весници и на интернет страницата на Државниот завод за статистика стои дека ангажманот ќе биде регулиран со договор на дело. Не стои колкав надомест ќе добива попишувачот, но предвидено е пред да бидат избрани кандидатите, да поминат и соодветно тестирање.
Во огласот стои целосна табела за тоа за кој реон по колку попишувачи се потребни. Заводот ќе избере десет проценти повеќче од потребните за да бидат резервни.
Директорот на Државниот завод за статистика неодамна изјави дека во оваа статистичка операција ќе учествуваат околу 6.000 лица, околу 5.000 попишувачи, околу 500 реонски инструктори и околу 200 државни инструктори и членови на комисиите.
Пописот ќе чини 8.5 милиони евра. Дел од средствата ќе се искористат оваа година за подготовка на апликативното решение и набавка на опрема. Резултатите од пописот ќе бидат достапни 6 месеци по завршувањето.