ЌЕ ИМА ЛИ КРАЈ НА ЗЛОУПОТРЕБИТЕ: Познато до кога треба да се донесе новиот закон за јавни набавки
Објавено во: Финансии 09 Јуни, 2018
Поголема транспарентност на постапките, поедноставни процедури и услови за реална конкуренција. Ова се само дел од предвидените промени кои се најавуваат со новиот закон за јавни набавки кој треба да биде донесен најдоцна до октомври .
Според најавите на Министерството за финансии законот ќе стапи на сила од наредната година.
Новиот закон за јавни набавки се очекува да ја врати Македонија на патот кон ЕУ а целта е да се добие современ закон што ќе ги имплементира досегашните позитивни искуства, но и ќе ги искорени негативните ефекти кои се видливи.
Министерот за финансии Драган Тевдовски на јавната дебата со институциите за Нацрт текстот за законот за јавни набавки кажа дека се предвидени нови постапки, нови алатки во делот на електронските јавни набавки, нови вредносни прагови за примена на Законот, но и зајакната контрола.
Преку јавните набавки годишно се троши една третина од буџетот и затоа вклучените страни сметаа дека сериозно треба да се вложи напор во барањето механизми за спречување на корупцијата и злоупотребите на парите.
Како дел од реформите претходно беше укинат Советот за јавни набавки бидејќи во пракса се покажало дека тоа што овој институт не ги дал очекуваните придобивки за олеснување на постапката за јавните набавки, туку бил кочничар преку кој се одолговлекувале постапките.