Ќе има ли прогресивен данок: Референдумот ја одложи реформата?
Објавено во: Економија 09 Септември, 2018
Нема да се брза со воведување на концептот на прогресивно оданочување кое беше најавено до 1 јануари следната година, потврди денеска премиерот Зоран Заев.Тој рече дека референдумската кампања ја одложила дебатата која требаше да се води ова лето во врска со воведувањето на прогресивниот данок.
Одговарајќи на новинарско прашање Заев истакна дека не може со сигурност да каже дали од 1 јануари ќе стапи во сила оваа реформа, нагласувајќи оти ако нема доволно време нема да се брза. Тој додаде дека еден од условите за оваа даночна реформа е да се даде доволно време за подотовка на економијата и на граѓаните.
– Даночната реформа реално ја одложивме. Ќе беше скриена, недоволно транспаретна, во момент кога дебатата за референдумот е толку силно отворена. Плановите беа да ја отвориме на почетокот на летото, да се дебатира во текот на летото, во септември да ги носиме одлуките, но се случи Договорот со Грција, со што се јави потребата да донесеме одлука за одложување на дебатата, затоа што малку граѓани и деловни луѓе ќе слушнеа за потребата за ваквата даночна реформа, рече Заев.