Добивај вести на Viber
Владата го утврди синоќа текстот на законските измени со кои се предвидува зголемување на еколошката такса за горивата. Иако давачката се носи со првенствена цел да се намали загадувањето односно за еколошки цели, Владата планираше на ваков начин да ги зголеми буџетските приходи во време кога растат потребите во постковид периодот и се зголемува јавниот долг. Премиерот Зоран Заев вчера по усвојувањето на одлуката тврдеше дека граѓаните треба да знаат дека влијанието на оваа мерка нема да биде поголемо од 0,07 отсто. Образложението го врза со намалувањето на акцизата од три денари кое беше врзано со цената на нафтата, трошок кој веќе не постои. Секако без оглед на тоа, факт е дека новата еколошка такса е нов трошок, а државата ќе инкасира во буџетот дополнителни приходи од неа. Според првичните пресметки кои патем прв ги оболодени токму премиерот Заев од оваа давачка ќе се приберат во буџетот 1,685 милијарди денари (27,3 милиони евра) за едно полугодие или 3,3 милјарди денари (54,6 милиони евра) за цела година.
Според предлог измените се предвидува зголемување на еколошката такса, односно се предлага зголемување на давачката за увоз на нафтените деривати во земјата за 3,5 денари за моторен бензин со содржина на олово повисока од 0,013 г/л и за авионски бензин, гориво за дизел мотори, екстра лесно масло за горење и масло за горење М1, М2 (мазут), како и зголемување од 3,1 денар за моторниот безоловен бензин со содржина на олово до 0,013г/л како помалку загадувачки нафтен дериват во однос на останатите предвидени деривати.
„Оваа мерка никој не би ја донел во време на изборна година и треба граѓаните да знаат дека влијанието на оваа мерка нема да биде поголема од 0,07 проценти. Со падот на цената на нафтата на светските берзи се анулира висината на акцизата од 3 денари која ја воведовме заради ублажување на последиците од КОВИД-19 и со тоа навистина не се очекува поголемо влијание на цената заради еколошката такса“, тврди премиерот Заев.
И покрај тоа што на ваков начин се ублажува поскапувањето стопанството веќе реагираше, а и познавачите имаат дилема дали ова би имало ефект за еколошки цели.
„Имајќи предвид дека енергенсите се неизбежна ставка во работењето на компаниите, сосема е јасно дека зголемувањето на еколошка такса од 3,5 денари, ќе ги зголеми трошоците на работењето и со тоа ќе ја намали ценовната конкурентност на домашните производи. Заради тоа цениме и побаравме од Владата на РС Македонија да се отвори расправа со Коморите за ова прашање, што е и прифатено. Очекуваме да се отвори расправа по Одлуката за зголемувањето на еколошка такса, одговорија од комората за Фактор.
Сепак Владата ги усвои измените.