Ќе остане додека размислуваат за поразот, но на следните избори лабуристите ќе одат без Корбин
Објавено во: Свет 13 Декември, 2019
По разочарувачката ноќ за него и за неговата партија, лидерот на британската Лабуристичка партија, Џереми Корбин, изјави дека нема да ја предводи партијата на следните избори.
Тој порача дека ќе остане на чело на партијата во текот на процесот на размислување за резултатите од вонредните парламентарни избори, кои, како што наведува „Би-Би-Си“, се најлошите што лабуристите ги оствариле од 1935 година досега.
„Ова очигледно е многу разочарувачка ноќ за Лабуристичката партија, со резултатите што ги добивме. Нема да ја предводам партијата ни во каква идна предизборна кампања“, рече Корбин.
Конзервативната партија на Борис Џонсон оствари убедлива победа на вчерашните избори и обезбеди мнозинство во парламентот, со што е отворен патот кон реализација на Брегзит.