Кога обвинителството ќе објави детали за бегството на Груевски?
Објавено во: Македонија 12 Декември, 2018
За две седмици Јавното обвинителство ќе објави информации од истрагата за бегството на поранешниот премиер, Никола Груевски.
Ќе се знае на кој начин тој ја напуштил Македонија. Идната недела претставници од Обвинителството ќе одат во Црна Гора да ги земат видео материјалите поврзани со овој случај, а од Албанија се бара и таа што поскоро да ги достави материјалите со кои располага.
„Добивме информација од колегите од Црна Гора дека ги прибрале сите снимки кои ни се потребни и во понеделник или вторник ќе одиме да ги преземеме. Колегата вчера ургираше во Албанија да ни се достават што поскоро материјалите што тие ги имаат“, изјави денеска обвинителката Вилма Рускоска.
Таа вели дека прегледувањето на снимките што ги имаат е при крај.
За фотографијата на Груевски што беше објавена вчера во медиумите и по социјалните мрежи, Русковска рече дека најверојатно ќе преземат активности да видат од каде потекнува и кој ја направил фотографијата. Со оглед на тоа што на неа покрај Греувски, за кој се тврди дека е сликан во Будимпешта, е препознат и еден од обвинетите за случајот на СЈО „Насилство во општина Центар“, Рускоска истакна дека во Обвинителството ќе бидат повикани сите за кои се смета дека можат да дадат одредени информации во врска со бегството на Груевски.
Груевски пред месец дена избега во Унгарија, и доби политички азил. Груевски е обвинет во неколку предмети на Специјалното јавно обвинителство, за што Собранието му го одзеде имунитетот, а за дел од нив во отсуство му е одреден и притвор.
Nовинар на британски „Гардијан“ вчера на Фејсбук објави фотографија од Груевски во Будимпешта, прва по неговото бегство од Македонија.