Кои се најдобро платени банкари во Македонија?
Објавено во: Економија 18 Декември, 2018
„Фактор“ ги извади бруто трошоците за вработените што ги плаќаат осум банки чии акции котираат на берзата и ги спореди податоците од финансиските извештаи за првите девет месеци и бројот на вработени. Највисоката просечна бруто банкарска плата е надминува 1.285 евра, а најниската е 858 евра. Ако се знае дека придонесите се околу 30 отсто од бруто платата тогаш најслабо платената просечна банкарска плата е 600 евра и е значајно повисока од државниот просек во стопанството
Какви се просечните плати во македонските банки? Ова е податок што не може да се најде директно, но може да се добие посредно. Резултатот е приближно точен, но е веродостоен затоа што е добиен од сумата што банката за првите девет месеци ја издвоила за исплата на трошоците за вработени и е поделена со бројот на вработени во банката (заклучно со 30 јуни годинава) па поделено со бројот на месеци за кои се однесува сумата. Според добиените бруто износи просечно по вработен најдобро плаќа НЛБ Банка , а најмалку Централна кооперативна банка. Обработени се резултатите на осум домашни деловни банки чии акции се котираат на пазарните сегменти на берзата и тие објавуваат квартални извештаи. Другите банки кои не се опфатени во рангирањето не објавуваат квартални извештаи на Македонската берза за хартии од вредност.
Р.Ф.