Кој ќе биде третиот службен јазик во Петровец?
Објавено во: Македонија 20 Март, 2018
Општина Петровец ќе стане тријазична откако ќе биде усвоен предлогот да се воведе и босанскиот јазик како службен на општината, што е вистинска реткост во Македонија. Според одлуката на Советот на општина Петровец граѓаните Бошњаци ќе може да комуницираат со локалните власти на нивниот мајчин јазик.
Политичари од Петровец ја оценуваат одлуката како историска, а заменик-градоначалникот на Петровец Елми Керими, етнички Албанец, изразува надеж дека нивниот пример ќе почне да се применува во цела Македонија.
На наредната седница на Советот на општина Петровец се очекува и официјално да се спроведат промените за статусот на босанскиот јазик во Петровец. Во Македонија засега само четири општини се тријазични, Гостивар, Врапчиште, Крушево и Чучер Сандево. Во 26 општини во службена употреба се по два јазика, додека во 50 – статус на официјален јазик има само македонскиот.