Кој ќе ги топли скопјани: Сезоната ќе почне, градот чека легализација на мрежата

Добивај вести на Viber

Иако основаше ново претпријатие Градски енергетски системи, градот Скопје до  почетокот на грејната сезона најверојатно нема да ја преземе мрежата за парно греење. Градоначалникот Петре Шилегов објасни дека процесот засега не е завршен оти мрежата е дивоградба. Кога ќе заврши легализацијата, тогаш ќе биде и превземањето. Не се претпоставува кога ќе се случи тоа, но може да биде и во време на сезона. По легализацијата, како што вели Шилегов, ќе бараат Владата да им ја пренесе сопственоста на мрежата за да може од Регулаторната комисија за енергетика да бараат лиценца за работа.

„По легализацијата и запишување на сопственоста, ќе побараме од Владата, мрежата да ни ја даде на користење, со што ќе се стекнеме со услови да можеме да влеземе во постапка за издавање на лиценца за дистрибуција и снабдување со топлинска енергија“, вели Петре Шилегов градоначалник на Град Скопје.

Градот има интерес само да управува со мрежата, но не и со производството, што значи дека може лиценцата да ја добие и по започнувањето на грејната сезона. Само 23 отсто од површината на Скопје е покриена со систем за парно греење, на кој се приклучени 17 отсто од домаќинствата.

„Тоа што инсистирам е топлификациската мрежа која и е дадена на користење на компанијата Балкан енерџи груп (БЕГ), да се врати таму каде што е сопственоста, а тоа на Град Скопје. Ги подготвуваме перформансите во текот на наредниот месец да ги основаме неопходните правни субјекти, за да можеме во август да побараме од Регулаторната комисија да започне постапка за издавање лиценци и на претпријатието кое се занимава со дистрибуција на топлинска енергија и на претпријатието кое се занимава со гасификација, рече Шилегов во јуни.

Нагласи дека тоа што се обидува е да го врати на Скопје тоа што било одземено во последните 30 години. Имено таа мрежа е сопственост на градот, затоа што дел од средствата или партиципирањето во изградбата на таа мрежа се токму на граѓаните кои со плаќањето на приклучоците и услугите всушност ја имаат изградено.