Колку може да даде, но колку дивиденда ќе дели „Македонијатурист“?
Објавено во: Економија 22 Март, 2018
Акцијата на „Македонијатурист“ на секој инвеститор односно акционер ќе му донесе 3 евра дивиденда односно поточно 187 денари во нето износ. Во споредба со пазарната цена на таа акција за последниве 6 месеци дивидендата е принос од околу 4 отсто. Подобро од банкарските камати, но „Македонијатурист“ станува неконкурентна на другите акции...
Секоја акција на „Македонијатурист“ носи дивиденда од 187 денари, ова е најновата вест за претстојното акционерско собрание на најголемата домашно поседувана хотелиерска компанија за распределба на добивката од 2017 година. Бруто дивидендата по акција изнесува 208 денари. Вкупно во дивиденда „Македонијатурист“ ќе распредели 84,7 милиони денари. Од вкупната добивка остварена лани околу 25 милиони денари ќе бидат распределени за нови инвестиции.
Во предлог одлуката е наведено дека уште 300.000 денари ќе бидат распределени по одлука и Статут и тие се дел од ставката од 17,4 милиони денари пари наменети за распределба по одлука и Статут. Рестото до 17,4 милиони денари односно речиси 17,1 милиони денари „Македонијатурист“ ќе ги повлече од својата нераспределена добивка остварена пред 2008 година!!! Многу важен момент кој според нашите податоци е преседан во акционерската пракса на оваа компанија во последниве 5 години.
„Македонијатурист“ е една од најстабилните акции на домашниот пазар препознатлива по тоа што со години наназад дели дивиденда на своите акционери. Она што го сакаат фондовите е тоа што таа компанија има многу предвидлива дивидендна политика. Нешто на што може да се смета. Но веќе станува отворено прашање одржливоста на приходите и конкурентноста на компанијата на домашниот угостителско-хотелиерски пазар.
Р.Ф.