Колку пари врти бизнисот со софтвери?
Објавено во: Економија 21 Мај, 2019
Шест софтверски компании активни во земјава со распон на приходи од 3,4 милиони евра во 19,7 милиони евра беа опфатени во споредба на „Фактор“. Заедничко за сите нив е тоа што книжат раст на приходите лани во споредба со 2017 година. Најголем е „Сеавус“, најголем процентуален раст на приходи има „Некстсенс“, а „Ендава“ има најголем скок на профит. Ерата на дигитализација го прави своето, сите директно или индиректно сме нивни клиенти. Кај пет од шестте анализирани профитната маргина се движи од најмалку 8,6 отсто до најмногу 18 отсто
„Фактор“ направи анализа врз официјални достапни податоци на избор од шест софтверски компании кои имаат седишта или подружници во нашата земја. Заедничко за сите нив е што им расте бизнисот односно приходите од продажба, а притоа сите се во добивка, а дел од нив имаат и солидни профитни маргини.
„Сеавус“ има најголеми приходи и најзначен профит во споредба со другите компании кои беа предмет на споредбата. Оваа голема софтверска компанија која години наназад успешно работи во земјава лани имала приходи од продажба во износ од 19,67 милиони евра. Тие пораснале за 24,5 отсто во однос на 2017 година. Оваа компанија која вработува повеќе од 400 лица и лани оствари добивка од 3,52 милиони евра. Таа е повисока за 25 отсто во однос на 2017 година. „Сеавус“ е компанија со најголема добивка во однос на другите пет анализирани компании.
„Ассеко“ македонска подружница на полска софтверска компанија која е присутна на нашиот пазар лани имала приходи од 14,7 милиони евра. Тие се за 14 отсто повисоки од претходната 2017 година. Добивката на „Ассеко“ лани е 2,2 милиони евра и е за 17,4 отсто повисока од претходната 2017 година.
„Некстсенс“ е успешна домашна компанија која солидно се справува со странската конкуренција. Лани оваа фирма остварила приходи од 7,48 милиони евра и има најголем раст на приходи во однос на конкуренцијата од 58,5 отсто. Компанијата лани остварила добивка од 636.215 евра и таа е за 61,5 отсто поголема од профитот во 2017 година.
Конкурентна е и „Ендава“ подружница на британска компанија за софтверски решенија. Endava PLC е базирана во Лондон, и котира со акции на NYSE (DAVA),со седиште во Скопје. Нејзиниот приход лани е 6,6 милиони евра и книжи раст од 48 отсто во споредба со претходната година. Профитот на „Ендава“ лани е 105 отсто повисок од 2017 година и изнесува 537.800 евра.
„Алокејт“ е подружница на британска компанија за софтверски решенија. Лани има приходи од 3,85 милиони евра и таа е повисока за 27 отсто од претходната година. Нето добивката е околу 400.000 евра и е речиси идентична со профитот од претходната година.
„Мусала Софт“ е скопска подружница на бугарска софтверска компанија. Лани нејзините приходи се 3,4 милиони евра и се за 44 отсто повисоки од претходната година. Добивката за лани е 5.000 евра.Р.Ф.