Колку порасна државниот долг во записи и обврзници за 5 месеци?

Добивај вести на Viber

Државниот долг изразен во државни записи и обврзници (заемите од домашните деловни банки, институционални инвеститори и физички лица н.з.) на 17 септември достигна нова највисока вредност. Сега изнесува 1,922 милијарди евра и за пет месеци е зголемен за 144,6 милиони евра. Добра вест, во оваа ситуација, е тоа што каматите генерално се пониски за последните во однос на претходните задолжувања

Долгот на Владата, т.е. на Министерството за финансии на домашниот пазар на пари на 17 септември изнесува 1,992 милијарди евра, покажуваат официјалните податоци објавени на веб страницата на Министерството за финансии.
Според достапни податоци државниот долг спрема домашните кредитори кои купувале државни записи и државни обврзници за пет месеци (состојба на 2 април 2020 година) изнесувал 1,778 милијарди евра. Тоа значи дека за 167 дена долгот пораснал за 144,6 милиони евра. Во споредба пак со состојбата од 5 септември 2018 година (за две години) долгот на државата кон приватните домашни кредиторисега е поголем за 375,8 милиони евра.

Каква е структурата на долгот со состојба на 17 септември годинава?

Најголема ставка имаат 15 годишните државни обврзници и нивниот износ во вкупниот долг е 683,4 милиони евра. Последната позајмица е со годишна каматна стапка од 3 отсто и во спроедба претходната позајмица каматата е повисока за 0,1 отсто.

Втора најголема ставка во должинчката структура ја чинат 12 месечните државни записи. Состојбата на долг по тие инструменти на 17 септември е 562,78 милиони евра.

Следува 30 годишната обврзница со состојба од 161,6 милиони евра и годишна каматна стапка од 4,1 отсто на последната реализирана аукција. И тука има раст на каматата затоа што на претходна аукција каматата била 4 отсто годишно.

Долгот по 10 годишната обврзница изнесува 137,9 милиони евра со каматна стапка од 3,4 отсто. Тука има пад од 0,5 поени во однос на претходната каматна стапка која била 3,9 отсто.

Долгот по инструментот 5 годишна обврзница е 134,1 милиони евра со последна каматна стапка од 1,4 отсто со пад од 0,1 отсто. По 3 годишната обврзница состојбата на долг изнесува 91,4 милиони евра со годишна камата од 1,5 отсто (0,1 отсто пониска од претходната аукција), а по 2 годишната обврзница долгот изнесува 88,6 милиони евра со годишна каматна стапка од 0,9 отсто што е за 0,2 отсто пониска од претходно реализираната на аукцијата.

Подетални информации има на следниот линк https://finance.gov.mk/