Колку заработил лани Ванчо Чифлиганец?

Еден од најголемите градежници во земјава, сопственик на „Адора Инженеринг“, поранешен пратеник на СДСМ и некогашен долгогодишен директор на единствениот македонски рудник за бакар „Бучим“ лани имал приход од 24.400 евра!

Ова е официјален податок за годишните примања на Ванчо Чифлиганец, кој воедно е и член на Надзорниот одбор на „Комерцијална банка“ и е достапен во годишниот извештај за работењето на оваа банка.

Според извештајот во делот на примањата на членовите на Надзорниот одбор кај податоците за материјалните надоместоци и други права од договори за работа кај Чифлиганец е наведен бруто износ од 1,5 милиони денари (24.390 евра).

Со оглед на тоа што Чифлиганец на крајот на декември лани исполнил услови за старосна пензија (со вклучено продолжување до полни 67 години) не може да се даде прецизна проценка за тоа колкав дел од неговите приходи се од плата, а колку од пензија.  

Ванчо Чифлиганец има политичка , но особено импресивна бизнис кариера. По пофесија е геолог кој дипломира, магистрира и докторира на државниот рударски факултет во Штип. Долги години од својата кариера работи во „Бучим“, а потоа започнува сопствен градежен бизнис и основа семејната фирма „Адора инженеринг“. Неговата семејна компанија за градежништво е специјализирана за изградба на објекти за колективно домување (популарно познати како станбени згради).

Чифлиганец влегува во Надзорниот одбор на „Комерцијална банка“ во 2018 година кога неговата компанија започнува да купува акции во таа банка. „Адора инженеринг“ заедно со придружените друштва сега во „Комерцијална банка“ контролира 15 отсто од акциите со право на глас. Тоа ја прави најголем поединечен акционер.